La Cincent di Carlo

                                                                                             foto carlozanzi


Come promesso ecco il testo anche della poesia classificatasi al secondo posto al concorso Poeta Bosino, 'Cin...cin...Cincent' di Carlo Piccinelli.

CIN...CIN…CINCENT

di carlo piccinelli

Un cinch davanti a du zeri, cincent,

numer che’l  par na parola cines,

gubela da fer che la merita un munument,

prudig da mecanica, ses quintal da pes.

Un para da pistoni d’un quart da liter,

dent al mutur, che’l girava me un reuplan,

quatar post, asee comud, in nanca tri meter;

prima machina, purtada a cà da segonda man.

Par pizzala se tirava na stangheta,

cin…cin…cin e girava ur viament,

na schisciada sul gas, par fa ara dupieta,

e a ttiragh ur coll, la rivava fin a cent.

Culur nisciora, carta da zucor o ross quadrel,

mudel Bianchina, version lusso o normal,

cui rod dedre che vardavan su l’ass di furmagell,

e ur tecc che’l sa squatava, roba special.

Al sabat sira se pasava ra dogana,

cartaverda e cinmila lir, par faa rifurniment,

quinda liter da super, par tiraa na setimana,

e nasteca de sigarett, scundù sott ar paviment.

L’era bell caregaa na signurina e menala a spass,

infirass dent a na streciora e, tra curag e fifa,

faa finta da vess a secch e poo fermass,

par pruaa a rubaa un basin o a purtaa a cà na sgiafa.

Pagina d’un temp,d’un mond, ra nosta storia,

ann cun in cò: brillantina e cuntestazion,

Meneghin, Raga…Ignis, mument da gloria,

prim in Italia, in Europa, Vares campion.

Cara la mè vetura, testimoni  d’un temp alegher,

un dì, rugina e straca, t’ha  menaa via ur rutamatt,

de ti me resta na futugrafia in bianch e negher,

e tanta nustalgia, par i nost vint’ann da matt!